Pas dy rinovimeve dhe një largimi ka mbërritur edhe firma e parë për ekipin shkodran.
Presidenti Xhaferi prezanton mesfushorin Amir Kahrimanoviç
Ka qenë në preferencën e shkodranëve edhe në sezonin e kaluar futbollistik, por firma ka ardhur vetëm dje, kur presidenti i KF Vllaznia, Alban Xhaferi ka pritur në zyrën e tij futbollistin kroat, Amir Kahrimanoviç, me të cilin ka nënshkruar kontratën zyrtare për ta bërë atë pjesë të Vllaznisë me afat një vjeçar. Një gjë të tillë drejtuesit e kanë deklaruar përmes faqes zyrtare të klubit në të cilën shkruhej.
“KF Vllaznia dëshiron të bëjë të ditur se nga sot pjesë e saj do të jetë edhe futbollisti Amir Kahrimanoviç. Drejtuesit e klubit kanë rënë dakord dhe më pas është firmosur një kontratë njëvjeçare me mesfushorinfantazist që në dy sezonet e fundit ka qenë pjesë e ekipit të Erzenit ku ka spikatur me performancën e tij”, shkruante klubi kuqeblu.
Në këtë mënyrë, kuqeblutë kanë nisur në mënyrën më të mirë riorganizimin e skuadrës për Kupat e Europës, si dhe Kampionati Kombëtar, ku pas dy firmave të para, serbit Milos Stojanoviç dhe kroatit Marko Juriç, me të cilët rinovuan vazhdimin e kontratës edhe për një sezon, vjen edhe firma tjetër me mesfushorin kroat Amir Kahrimanoviç.
RINOVIMET Nga sa mësohet drejtuesit e klubit dhe kryesisht drejtori sportiv i saj Tefik Osmani po shikojnë mundësinë për të rinovuar me shumicën e lojtarëve që u ka mbaruar kontrata për sezonin e ri. Ata mësohet se janë në diskutime me Malën, Hakajn, Boshnjakun e Balën. Nga sa mësohet këtyre lojtarëve u përfundon kontrata me ekipin që në fund të muajit qershor. Por nga sa mësohet ende nuk dihet mbi të ardhmen e tyre.
Hakaj mësohet se ka shumë oferta nga ekipe të Superiores, por edhe nga skuadra turke dhe ekipit të tjera me shumë emër në Ballkan. Ndërsa për Boshnjakun interesimi është nga ekipet kosovare dhe të Maqedonisë më Veriut. Nuk dihet ofertat që do të mbërrijnë apo kanë mbërritur nga ekipet si brenda apo jashtë superiore. Me shumë gjasa Smajli nuk do të jetë pjesë e Vllaznisë për sezonin e ri.
