Agjenti i Giovanni Di Lorenzos, Mario Giuffredi, këmbëngul se mbrojtësi italian dëshiron të largohet këtë verë edhe nëse Antonio Conte e merr drejtimin e ish-kampionit italian: "Klubi nuk mund të pretendojë se asgjë nuk ka ndodhur".
Giuffredi shpjegoi vendimin e Di Lorenzos për t'u larguar nga stadiumi “Diego Armando Maradona” të hënën pasi klienti i tij u fishkëllye nga tifozët e Napolit në ndeshjen e fundit të sezonit kundër Lecces, raporton KosovaPress.
Me Antonio Conten që pritet të emërohet si trajneri i ri i Napolit, Giuffredi u pyet nëse klienti i tij mund të ndryshonte mendje, por përgjigja ishte mjaft e qartë.
Agjenti e konfirmon se Di Lorenzo dëshiron të largohet nga Napoli edhe nëse vjen Conte.
“Nuk do ta mohoj atë që kam thënë së fundmi. Nëse klubi na thotë se ata do ta shesin lojtarin për ofertën e duhur, kjo do të thotë se klubi nuk beson më tek ai dhe se ai nuk është në qendër të projektit”, tha Giuffredi për “Tele A”.
Di Lorenzo dëshiron të largohet edhe nëse burimet më të rëndësishme italiane pretendojnë se Conte do të donte ta mbante atë në klub.
“Ata duhet të kishin menduar për këtë së pari. Ata mund të kishin punësuar fillimisht menaxherin dhe më pas të flisnin me Di Lorenzon”, tha agjenti i lojtarit.
"Nuk mund të thuash diçka dhe më pas të tërhiqesh dhe të pretendosh se asgjë nuk ka ndodhur", tha më tej Giuffredi.
Di Lorenzo, 30 vjeç, iu bashkua Napolit në një marrëveshje prej 9.8 milionë eurosh nga Empoli në verën e vitit 2019 dhe ishte kapiteni i Napolit kur fituan titullin e Serie A në 2022/23, i treti në historinë e klubit. Di Lorenzo është përfshirë në skuadrën e Italisë për Euro 2024 dhe kontrata e tij me Napolin skadon në qershor të vitit 2028.
