Rey Manaj e mbylli me Sivasspor në mënyrën më të mirë të mundshme.
Sulmuesi shqiptar i dha lamtumirën turqve në ndeshjen e fundit në shtëpi duke u përshëndetur me tifozët në tribuna. Bomberi lushnjar shkëlqeu këtë sezon duke shënuar plot 22 gola në kampionat e kupë e duke e mbyllur si golashënuesi i tretë më i mirë pas Edin Dzeko e Mauro Icardit.
Këto shifra e vendosin në qendër të merkatos dhe s’kishte si të mungonin interesimet nga jashtë, kryesisht Spanjë e Itali. Janë pikërisht medier italiane që raportojnë se për ish-sulmuesin e Interit ka mbërritur një ofertë zyrtare nga Como.
Skuadra e sapongjitur në Serie A kërkon lojtarë cilësor për të bërë surprizën në elitën italiane dhe Manaj është dëshirë e ish-kampionit të botës, Cesc Fabregas që është aksioner i klubit. Është thuajse i sigurt rikthimi i tij në Itali teksa mbeten vetëm detajet personale për t’u zgjidhur.
Kujtojmë që Manaj është ftuar gjithashtu edhe në Europian me Kombëtaren shqiptare dhe mbetet për t'u parë nëse e ardhmja e tij do të zgjidhet para startit të kompeticionit apo pas tij.
