Juventusi dhe Napoli, gati për të bërë një shkëmbim të bujshëm!
Ideja e fundit e transferimit që përfshin Juventusin dhe Napolin ka të bëjë me një shkëmbim të bujshëm. “La Stampa” shkruan për këtë sot, në faqet e saj, teksa nuk e përjashton transferimin e Federico Kieza në hijen e Vezuvit dhe të Xhiovani Di Lorenzo në “Continassa”.
Gazeta torineze nënvizon se numri 7 aktual bardhezi nuk konsiderohet i patransferueshëm nga “Zonja e Vjetër”, ndërsa kapiteni i kombëtares italiane është në mosmarrëveshje me klubin e De Laurentiis dhe ka kërkuar largimin edhe përmes deklaratave të agjentit të tij, Xhiufredi.
Shkëmbimi nuk është i pamundur, sipas “La Stampa”, megjithëse përfundimisht do të jetë e nevojshme të shtohet një shumë parash në favor të Juventusit, i cili e vlerëson Kieza-n rreth dyfishin e vlerës së Di Lorenzo, për të cilin Napoli kërkon rreth 20 milionë euro. Diskutimet mes dy klubeve janë në vazhdim.
