Redon Xhixha ka hedhur poshtë mundësinë për një rikthim në Superiore. Sulmuesi i Qarabag është nën kontratë me klubin azer, por minutat i kanë munguar këtë sezon.
Xhixha e nisi shkëlqyeshëm me 5 gola në kualifikueset europiane dhe 2 në kampionat, por më pas pësoi një dëmtim që e mbajti 4 muaj jashtë fushe.
Rikthimi nuk shkoi siç e priste duke mos gjetur hapsira në formacion, madje as nga stoli. Në janar, Tirana e Partizani, me ‘urdhër’ të Orges Shehit, nisën të ëndërrojnë për një rikthim të mundshëm që në fund nuk u krye. Me ardhjen e merkatos së verës emri i tij rikthehet në treg.
Megjithatë, është vetë kurbinasi që mohon zërat për rikthimin në Shqipëri teksa preferon të sqarojë çështjen me Qarabag e më pas të shohë për një tjetër kampionat jashtë. I pyetur se cila do të jetë e ardhmja, Xhixha u shpreh se kjo mbetet ende enigmë dhe agjenti po punon në këtë pjesë.
“Jetës nuk i dihet, unë kam kontratë me Qarabag edhe 2 vite. Nuk di ç’të them pasi punojnë menaxherët dhe vendos Qarabagu. Do të shohim më të mirën për mua dhe ekipin. Të ardhmen nuk e dimë, mund të jem te Qarabag ose në ndonjë ekip tjetër”, tha Xhixha në ‘Zona 30’.
