Fiorentina gjen trajnerin e ri. Fill pas vendimit për ndërprerjen e bashkëpunimit me Vincenzo Italianon, klubi vjollcë ka arritur marrëveshjen me Raffaele Palladinon, trajner i cili ka drejtuar me shumë sukses Monzën në dy sezonet e fundit.
Palladino zbarkoi në Firence të hënën dhe takoi drejtuesit e klubit, me të cilët arriti edhe marrëveshjen për të drejtuar Fiorentinën për dy sezonet e ardhshme, teksa media italiane bën me dije se pritet vetëm firma mbi kontratë dhe zyrtarizimi.
Dy sezonet e fundit Fiorentina është drejtuar nga Vincenzo Italiano, i cili bëri një punë të mirë, duke dërguar skuadrën dy herë në finalen e Conference League dhe njëherë në finalen e Kupës së Italisë, por pa ia dalë të fitojë asnjë trofe.
Pikërisht për këtë arsye në klubin vjollcë menduan të bëjnë ndryshime, duke i besuar Palladinos, i cili u promovua për herë të parë te Monza nga Adriano Galliani dhe bëri një punë mjaft të mirë në klubin Lombard.
