“La Gazzeta dello Sport” raporton se Juventusi vazhdon të mbetet i interesuar për sulmuesin anësor të Manchester United, Jadon Sancho.
“Zonja e Vjetër” e ka marrë këtë vendim, meqenëse “Djajtë e Kuq” nuk po e ulin çmimin e kërkuar për Mason Greenwood.
Juventusi dhe Manchester United janë prej kohësh në bisedime për një transferim të mundshëm të Greenwood në Itali, por sipas mediumit në fjalë, United kërkon të paktën 50 milionë euro për anglezin.
“Gazzeta dello Sport” shton më tutje se Giuntoli, drejtori sportiv i Juventusit, kishte arritur marrëveshje me Sanchon në janar, mirëpo Allegri kishte qenë kundër transferimit të tij, pasi nuk dëshironte të ndryshonte sistemin e lojës në gjysmë të sezonit.
Juventusi vazhdon të jetë i interesuar për një huazim për Sanchon, me kusht që United ia paguan një pjesë të pagës së tij, që shkon deri në 8.5 milionë euro.
Një transferim i përhershëm nuk është në diskutim fare, pasi klubi anglez kërkon po ashtu 50 milionë euro për shërbimet e Sanchos.
Sancho kaloi gjashtë muajt e fundit në huazim te Dortmundi, duke shënuar tre gola dhe duke dhuruar tri asistime në 21 paraqitje në të gjitha garat.
