Kampioni i Maqedonisë së Veriut në futsall, skuadra shqiptare Forca, ka njohur sot kundërshtarët në fazën e parë të sezonit të ri në Champions League.
Pas shortit të sotëm, Forca u gjend në grupin A, ku kundërshtar e ka kampionin e Andorrës, FC Rangers, kampioni i Republikës së Irlandës Blue Magic dhe ekipi më i mirë malazez, Titogradi.
Ndeshjet nga kjo fazë parakualifikuese do të luhen në turneun në Shkup në periudhën prej 20 deri më 25 gusht.
Vetëm skuadra e parë nga grupi do t'i bashkohet skuadrave të tjera në raundin elitar.
“Unë mendoj se ne jemi favorit kryesor për të ecur përpara, por këtë duhet ta dëshmojmë edhe në parket.
Ndeshja vendimtare do të jetë me Titogradin ku shpresojmë të festojmë dhe për herë të parë në këtë kompeticion, shpresojmë të shkruajmë histori”, tha trajneri Gazmend Hiseini pas shortit të sotëm..
