Gjiganti italian, Juventus kompletoi transferimin e mesfushorit brazilian, Douglas Luiz nga skuadra e Aston Villas, ndërsa sot e zyrtarizoi edhe transferimin e të dashurës së tij.
Alisha Lehmann është një lojtare e re e Juventus Women, ku ajo ka nënshkruar një kontratë me skuadrën e Juventusit deri më 30 qershor të vitit 2027, pasi ka mbërritur në Torino nga Aston Villa, raporton KosovaPress.
Një anësore sulmuese e njohur ndërkombëtarisht, Lehmann përforcon repartin sulmues të Juventusit - pas një sezoni në të cilin ajo bëri gjithsej 17 paraqitje dhe shënoi tre gola, pjesërisht e kufizuar nga lëndimet.
Futbollistja 25-vjeçare zvicerane filloi të merrej me futboll kur ishte vetëm nëntë vjeç në Konolfingen, përpara se të kalonte te Young Boys me të cilët bëri debutimin e saj në Serie A për femra në Zvicër në vitin 2016.
Sezonin pasues ajo përfundoi si golashënuesja më e mirë e Young Boys me nëntë gola dhe u thirr menjëherë në Angli, ku me fanellën e West Ham luajti në Super Ligën e Femrave FA - liga kryesore angleze për femra.
Pas huazimit te Everton, ajo u transferua te skuadra e Aston Villas, ku kaloi tre sezonet e fundit si anësore.
