Kodi Gakpo mendon se Holanda është përmirësuar dhe po bën përpara. Duke e krahasuar me ekipin e Katarit në vitin 2022, sulmuesi thotë që është duke e shijuar këtë kompeticion dhe shpreson që të shkojnë në finale dhe pse jo, ta provojnë ta fitojnë. “Europiani është një turne shumë i bukur.
Mendoj se jemi më mirë sesa turneu i mëparshëm i Botërorit.
Jam i kënaqur që unë bëj pjesë në këtë grup futbollistësh”, tha fillimisht sulmuesi. 25- vjeçari tregon se të gjithë në grup duan të përmirësohen dhe kjo sjell që edhe kombëtarja të jetë në përmirësim të vazhdueshëm. Ai thotë se ekipi do të kërkojë patjetër finalen.
“Sigurisht që e mendojmë finalen. Shpresoj që të përmirësohemi akoma më shumë. Duhet të bëjmë ndeshje perfektë në mënyrë që të shkojmë në finale. Të gjithë e duam këtë ndeshje”, thotë Gakpo.
PËRMIRËSIM- Sulmuesi ka folur edhe për veten, ku tregon që është rritur dhe është përmirësuar si person dhe si lojtar. “Nuk është rritur vetëm skuadra. Edhe unë jam rritur si lojtar dhe si njeri. Jeta ime ka ndryshuar shumë që nga viti 2022. Shkova të jetoja në një vend tjetër dhe të luaja në një klub tjetër. Aty kam shumë yje që më rrethojnë dhe kam mësuar shumë prej tyre. Sigurisht që kam mësuar edhe prej trajnerit Klop”, ka thënë autori i tre golave në këtë kompeticion.
DRIBLIMI- Në këtë Europian lojtari i Holandës bën shpesh një driblim që lë në vend kundërshtarët, por nuk ka frikë se ata do ta kuptojnë dhe mund ta ndalin. “Nuk e bëj gjithmonë. Unë shpesh kërkoj që të shkoj edhe nga jashtë dhe të krosoj topin brenda zonës. Por lojtarët përshtaten në fushën e lojës dhe në bazë të ndeshjes. Unë nuk jam i fiksuar për të bërë vetëm një lëvizje”, tregon Gakpo.
NDESHJA- Sulmuesi i Liverpulit ndoshta më shumë se kushdo e njeh mirë Anglinë, rivalin e radhës të Holandës në gjysmëfinalet e Europianit. “Anglia nuk është rastësisht këtu. Ka një grup fantastik lojtarësh me lojtarë shumë të mirë. Bellingam është një futbollist i klasit botëror.
Shpresoj që të jetë një ndeshje e shkëlqyer. Por edhe Holanda ashtu si Anglia është e fortë dhe kemi besim që do të shkojmë në finale”, përfundoi ai.
