Nga ankthi tek lotët për shkak të lëndimit, i cili e detyroi ta linte para kohës fushën në finale mes Argjentinës e Kolumbisë, e deri tek gëzimi për golin e Lautaro Martinezit, i cili ia siguroi “Albiceleste” titullin e dytë radhazi të Copa Americas.
Lionel Messi nuk do ta harrojë lehtë të dielën që shkoi dhe këtë e ka përshkruar edhe përmes një postimi në rrjetet sociale.
“Copa America përfundoi dhe gjëja e parë që dua ta bëj është që t’i falënderoj të gjithë ata që më kanë dërguar mesazhe.
Jam mjaft i lumtur, mbi të gjitha sepse e arritëm një objektiv të cilin e kishim vendosur dhe për shkak se Angel Di Maria po largohet me një tjetër trofe”, shkroi fillimisht Messi.
“Më të mëdhenjtë, si ai (Di Maria), Otamendi, ose unë, e kanë përjetuar me një emocion të veçantë këtë.
Kemi luajtur me shokët me përvojë dhe me një grup të të rinjsh që kanë dhënë gjithçka për çdo top. Jemi një skuadër dhe një familje, një grup spektakolar”, vazhdoi fituesi i tetëfishtë i Topit të Artë.
Vitet e fundit për Messin ishin të jashtëzakonshme pasi ai me shokë e fituan dy herë Copa American dhe një herë u shpallën kampionë të botës.
