Kylian Mbappe raportohet se nuk do të udhëtojë në Amerikën e Veriut në parasezon me pjesën tjetër të skuadrës së Real Madridit.
Kampionët në fuqi të Spanjës dhe Evropës do të kalojnë Atlantikun për udhëtimin e tyre në SHBA më 28 korrik, ku do të angazhohen në ndeshje miqësore kundër Milanit, Barcelonës dhe Chelseat.
Sidoqoftë, sipas “The Athletic”, transferimi i tyre i fundit, Mbappe, nuk do të jetë pjesë e udhëtimit dhe në vend të kësaj do të fillojë stërvitjen e tij parasezonale së bashku me shokët e tij të rinj të skuadrës në objektin stërvitor të Valdebebas nga shtatë gushti e tutje.
Mbappe ishte përfshirë me kombëtaren franceze në Kampionatin Evropian dhe për këtë arsye nuk pati një mundësi për të marrë një pushim nga aksioni pas një sezoni kërkues për klube me Paris Saint-Germain.
Dhe pas daljes së Francës nga “Euro 2024” në fazën gjysmëfinale kundër Spanjës më nëntë korrik, Mbappe, Carlo Ancelotti dhe drejtuesit e Real Madridit kanë zgjedhur kolektivisht një periudhë pushimi dhe rikuperimi për sulmuesin.
Pritet që sulmuesi tani të nisë një pushim për t’u çlodhur përpara se të kthehet në fushë në javën e parë të gushtit.
Në konferencën e tij të parë për shtyp si lojtar i Real Madridit, Mbappe zbuloi se ai është gati të bashkohet me trupat e Ancelottit, por do të pajtohet me vendimet e klubit në lidhje me pjesëmarrjen e tij në aktivitetet parasezonale. “Nëse klubi dëshiron që unë të shkoj, unë do të shkoj”, u tha ai gazetarëve.
