Sirenat arabe pushtuan gjithashtu Kevin de Bruyne. Mesfushori belg ka marrë një ofertë të çmendur, 1.2 milionë euro në javë, por nuk duket i gatshëm të largohet. Manchester City, megjithatë, nuk ka marrë ndonjë propozim zyrtar. Këtë e konfirmon Pep Guardiola në një konferencë për shtyp nga Orlando, ku skuadra është e angazhuar në turneun parasezonal në SHBA.
Trajneri spanjoll i “qytetarëve” nënvizoi më tej: “Klubi më ka informuar se ende nuk ka marrë asnjë ofertë.
Nuk e di se çfarë do të ndodhë, por dua që ai të qëndrojë. Ishte këtu para se të mbërrija unë si trajner. Ai është lojtari më i vjetër, pra ka qenë më gjatë se gjithkush tjetër këtu.
Ndodhi me David Silva për shembull dhe me lojtarë të tjerë, ai ka meritën ta vendosë i vetëm të ardhmen e tij.
Ajo që ka bërë për ne është e madhe, kështu që ai mund të vendosë çfarë dëshiron. Informacioni që kam tani për tani është se do të qëndrojë”.
