Partizani është futur edhe një herë në ujërat e trazuar të gjetjes së një trajneri të përshtatshëm për skuadrën. Të kuqtë shkarkuan Orges Shehin pas disa rezultateve negative dhe mosarritjen e objektivave të vendosura nga klubi.
Gjetja e një trajneri të ri cilësor në këtë periudhë të merkatos është e vështirë pasi shumica kanë nisur projektet e tyre me ekipe të tjera. Partizani, megjithatë, e ka një listë apo ide për profilin që dëshiron.
Ilir Daja dukej si ëndrra e madhe me trajnerin më të mirë shqiptar që përflitet se mund të largohet nga Ballkani, por gjasat janë të vogla që ai të rikthehet te Demat. Kështu, presidenti Gaz Demi dëshiron t’i rikthehet fiksimit të vjetër.
Në krye të Partizanit do të vendoset një italian ose kroat. Eksperiencat me Sormanin e Colellan i kanë lënë mbresa kreut të klubit, ndësa nuk mbetet pas as pista kroate për shkak të lidhjeve të ngushta që menaxheri Ardian Aliaj ka me futbollin kroat dhe ka marrë pjesë disaherë në afrimin e trajnerëve dhe futbollistëve te Partizani.
Ndërkohë, pista vendase është e pamundur. Trajnerët shqiptar janë ‘non-grata’ për Partizanin në këtë moment teksa as emrat e lirë nuk ofrojnë atë që të kuqtë kërkojnë.
