Piotr Zielinski është një nga transferimet më me vlerë për Interin në këtë merkato.
Polaku, pritet t’i shtojë më shumë fantazi organikës zikaltër teksa në një intervistë të fundit, lojtari shpreson që të ndihmojë skuadrën të fitojë sërish titullin kampion.
Ndër të tjera, Zielinski theksoi se nëse nuk do të ishte bërë futbollist, atëherë do t’i dedikohej tenisit ndërsa shtoi se një nga idhujt e tij më të mëdhenj është Roger Federer.
“Unë në fushë i përdor të dyja këmbët dhe kjo është një meritë e mamasë sime.
Në një turne futbolli kur isha i vogël, do të godisja një 11-metërsh dhe pyeta mamanë nëse mund të godisja me të majtën. Ajo më tha po, dhe unë nisa t’i përdorja të dyja këmbët.
Çfarë më pëlqen tjetër veç futbollit? Nëse nuk do të isha bërë futbollist, atëherë do të provoja tenisin.
Më pëlqen shumë, edhe pse nuk do ta kisha të lehtë. Idhujt e mi sportivë janë Roger Federer, pastaj Nadal dhe Djokovic.
Lojtari i preferuar? Tomas Rosicky në fillim, më pas Zidane, Ronaldinho dhe Iniesta. Këta emra më frymëzonin shumë”, u shpreh Zielinski.
