Ish-mbrojtësi i kombëtares franceze, William Gallas, i cili gjatë karrierës së tij ka veshur fanellat e Marseille, Chelsea, Arsenal dhe Tottenhamit, ndër të tjera, dhe që sot është trajner në ekipet e të rinjve të klubit hungarez Zalaegerszeg, ka dhënë një intervistë për portalin “Genting Casino”, në të cilën ka analizuar situatën e bluve të Londrës, të trajnuar nga Enzo Maresca.
Pesë ndeshje parasezonale, vetëm një fitore, me humbjen e fundit kundër Real Madridit (2-1), duke ngritur dyshime se sa të gatshëm janë londinezët për të filluar ta marrin seriozisht Premier League në sezonin e ri. Ja çfarë thotë Gallas për këtë çështje:
“Nuk ka rëndësi se është parasezon, unë jam i shqetësuar për Chelsea. Jam vërtet i shqetësuar kur shikoj lojën e ekipit. Pavarësisht të gjitha parave që ka shpenzuar në merkato, Chelsea nuk është ende një ekip mjaftueshëm i gatshëm për t’u kualifikuar në Ligën e Kampionëve të ardhshëm. Ka nevojë për më shumë cilësi”.
Për trajnerin italian, Gallas është pesimist: “Po nëse Enzo Maresca rrezikon të shkarkohet para Krishtlindjeve? Çdo gjë mund të ndodhë në futboll. Shpresoj që të qëndrojë të paktën deri në fund të sezonit dhe të ketë mundësinë të tregojë se çfarë mund të bëjë, por problemi do të jetë gjithmonë i njëjtë.
Nga ana tjetër, nëse ai nuk ka lojtarët dhe ekipin e duhur për të konkurruar në Premier League, atëherë do të jetë tepër e vështirë për të. Kjo nuk ndodh vetëm te Chelsea, largimi i trajnerit, por me të gjithë presidentët e Premier League. Ata nuk kanë durim të presin konsolidimin e ekipit, duan rezultate menjëherë.
Ndoshta Arsenali veproi ndryshe me Mikel Arteta, edhe Manchester United me Erik Ten Hag, por shumica e klubeve angleze nuk mendojnë në afatgjatë. Trajnerët tani zgjasin 6 muaj ose një vit, shpresoj që Chelsea të largohet nga kjo situatë dhe të qëndroj me Maresca për një periudhë të gjatë”.
