Sezoni 2024-2025 paraqet një sprovë për futbollistët, e paekspozuar kaq shumë më parë. Qoftë në nivel fizik apo mendor, lojtarët përballen me një skenar shkatërrues për shkak të grumbullimit të ndeshjeve dhe stresit, që kjo sjell. Real Madridi e nisi sezonin e ri më 14 gusht, me Superkupën e Europës, dhe mund ta përfundojë më 13 korrik 2025, me finalen e Kupës së Botës për Klube.
Ancelotti shpjegoi në konferencë për shtyp se skuadra e tij po përgatitet për një sezon që nuk ka asnjë lidhje me të mëparshmit. Kjo çon në gjëra të ndryshme, por Carlo e ka një plan.
“Ne nuk po mendojmë për 2025-2026, mund të fillojë më herët për shkak të Kupës së Botës, por jemi të fokusuar në këtë sezon. Lojtarët duhet të pushojnë, ata kanë nevojë për pushime. Ne po mendojmë t’u japim pushime individuale lojtarëve. Një lojtar mund të mos luajë për një javë dhe të shkojë të pushojë me familjen e tyre, veçanërisht ndërkombëtarët, të cilët nuk kanë një ditë të vetme pushimi. Ne po e vlerësojmë këtë me ekipin mjekësor dhe përgatitësit fizikë”.
Dhe në çfarë përkthehet kjo? Ancelotti dha një shembull shumë të qartë: “Nëse Vinicius shkon me Brazilin për të luajtur dy ndeshje, në kthim ai merr katër ose pesë ditë pushim. Nuk është se nuk do të jetë në ndeshjen tjetër, por nuk do të jetë në dinamikën e ekipit. Është e vetmja mënyrë që të bëni atë që dëshironi”.
Me më pak se dy javë para mbylljes së merkatos, Ancelotti insiston edhe një herë se nuk do të ketë zhvillime të reja në këtë drejtim, edhe pse qendra e mbrojtjes duket e brishtë me vetëm Rüdiger dhe Militao si “senatorë”: “Skuadra është e kompletuar, duhet të presim mbylljen e merkatos. Mendojmë se Alaba do të kthehet mirë. Ne kemi të rinj, që mund të luajnë në atë pozicion. Kemi pasur fatin e keq të dëmtimit të Joan, ndërsa Asencio dhe Jacobo mund të kontribuojnë”.
Real Madridi përgatit debutimin e tij në La Liga, pasi fitoi Superkupën e Europës. Ajo që nis në Mallorca shihet nga Ancelotti me optimizmin e një skuadre që nuk ndalet së fituari: “Jemi në një muaj mjalti. Mbetet i njëjti, është më i gjati në histori. Padyshim që jam shumë i lumtur. Është e vështirë të imagjinohet dita kur erdha këtu, më 2021, me gjithçka që kemi fituar. Askush nuk e mendoi, as ju gazetarët nuk kishit shumë besim”.
Kjo nuk do të thotë se Carlo e ka të qartë se ajo që ekipi i tij ka përpara është një detyrë e lehtë: “Ne mendojmë për realitetin, veçanërisht lojtarët. Janë ata që do t’i luajnë ndeshjet. Dhe ata e dinë se kur është e vështirë të fitosh. Futbolli kërkon cilësi dhe sakrificë. Të mendosh shumë përpara nuk është aspak mirë. Ne nuk mund të mendojmë se çfarë do të ndodhë në maj, duhet të punojmë çdo ditë për të arritur në maj dhe për të fituar çdo ndeshje. La Liga është argëtuese. Më pëlqeu ajo që pashë në ndeshjet e para. ‘Offside’ gjysmë automatik do të na ndihmojë”.
Për objektivin kryesor, përsëritjes së titullit, Ancelotti ka një nënshkrim të jashtëzakonshëm, atë të Mbappe: “Si të gjithë lojtarët e rinj, njerëzit në klub përpiqen t’i bëjnë ata të ndihen rehat. Ka ardhur një talent i jashtëzakonshëm, duhet ta ndihmojmë të përshtatet. Ai ka hyrë shumë mirë në dhomat e zhveshjes, me përulësi, shumë serioz… E ka filluar shumë mirë te Real Madridi, me gol dhe trofe që në ndeshjen e parë”.
