Ish-presidenti i UEFA-s, Michel Platini e ka dhënë një intervistë për të përditshmen italiane “La Gazzetta dello Sport”, përmes së cilës i ka shfaqur pikëpamjet e tij për formatin e ri të Ligës së Kampionëve dhe për të shumë-përfolurën Superligën Evropiane.
Platini e thotë hapur se nuk e pëlqen Championsin e ri, ndërsa u shpreh se një ditë do të themelohet liga e re, e cila është iniciativë e klubeve të mëdha evropiane.
“Formati i ri i Championsit nuk më pëlqen. Ajo e bukura ishte me 32 ekipe të ndara në grupe, por Ceferin ua shiti klubeve”, deklaroi fillimisht legjenda franceze.
“A do të ishte më e mirë Superliga? Jo, por një ditë, nuk e di nëse pas pesë apo njëzetë vjetësh, ajo do të bëhet. Klubet ishin dakord. Edhe Gjykata e ka thënë se monopoli UEFA e FIFA ka përfunduar”, vazhdoi ish-kreu i UEFA-s.
