Skuadra shqiptare e futsallit, Forca, e nisi me fitore ndeshjen në grupin kualifikues të UEFA Champions League.
Në SC “Jane Sandanski” në Shkup, kampioni i Maqedonisë së Veriut, ngadhënjeu me rezultat 4:2 ndaj kampionit të Republikës së Irlandës, Blue Magic nga Dublini.
Irlandezët kaluan në epërsi 1:0 me golin e Lucas në minutën e 5-të, por Ismaili barazoi në minutën e 17-të për Forcën.
Pasi irlandezët kaluan sërish në avantazh me golin e Saldanës në minutën e 21-të, më pas gjithçka ishte në shenjën e skuadrës shqiptare.
Dandan me golat në minutën e 27-të dhe të 30-të solli kthesën, 3:2 dhe Petroviq e vulosi fitoren në minutën e 39-të.
Në ndeshjen e dytë në grup, ekipi i Titogradit fitoi me 4:2 ndaj ekipit të Rangersit.
