Pengesë e dytë për Carlo Ancelottin këtë parasezon. Jude Bellingham është lënduar 48 orë para premierës në “Bernabéu” kundër Real Valladolid dhe do të mungojë për rreth një muaj.
Mesfushori anglez, i cili ka pësuar një goditje gjatë stërvitjes, vuan nga një dëmtim në muskulin e hollë shputor të këmbës së djathtë, thuhet në raportin mjekësor të ofruar nga “Los Blancos”.
Nëse koha e rikuperimit nuk shkurtohet, anglezi do të humbasë debutimin e të bardhëve në Champions League dhe të paktën 4 ndeshje të tjera të La Liga-s. Kur foli Ancelotti në konferencën e tij të zakonshme për shtyp para ndeshjes dhe zbuloi se skuadra do të stërvitet nesër në “Bernabéu”, Bellingham ishte ende duke iu nënshtruar testeve.
Kësisoji, trajneri italian nuk mund ta vlerësonte dëmtimin e anglezit para mediave. Ky është dëmtimi i dytë që Real Madridi pëson në fillim të sezonit, pasi Camavinga ndrydhi ligamentin e brendshëm kolateral të gjurit të majtë në prag të Superkupës së Europës ndaj Atalantës.
