E ardhmja e Victor Osimhen është gjithnjë e më në dyshim. Një javë para përfundimit të merkatos verore të transferimeve, sulmuesi nigerian nuk ka gjetur ende klub të ri. Ditët në vijim do të jenë vendimtare për të përcaktuar të ardhmen e tij.
Me Napolin që praktikisht e ka mbyllur blerjen e Lukakut, nigeriani tani rrezikon të bëhet një problem real.
E vetmja skuadër që ka bërë hapa konkret drejt tij ka qenë PSG, e cila megjithatë ende nuk ka paraqitur ofertë zyrtare.
Asnjë klub nuk i është afruar kurrë kërkesës fillestare prej 130 milionë eurosh të De Laurentiis, i cili me kalimin e kohës duhej të rimodelonte kërkesat e tij. Roberto Calenda, agjenti i lojtarit, është në kërkim të ofertës më të mirë për t’ia sjellë Napolit. Ka gjasa që PSG mund ta paraqesë një të tillë në ditët në vijim, por shumë më poshtë se kërkesa fillestare.
Rreziku më i madh është që asnjë skuadër të mos paraqesë ofertë deri të premten në mbrëmje, kur mbyllet merkatoja, duke detyruar kështu Osimhen të qëndrojë te Napoli (por jashtë skuadrës) të paktën deri në janar. Në sfond është gjithmonë Arabia Saudite, ku merkatoja mbyllet në tetor. Chelsea (që po mendonte për një huazim) dhe Arsenali janë tashmë opsione më të largëta.
