Partizani gjatë këtij sezoni duket se do të bëjë njëfarë reforme në ekipet e moshave, teksa “Panorama Sport” mëson se klubi i kuq ka përgatitur edhe hapjen e ekipit Partizani B, i mbyllur para disa vitesh.Klubi ka vendosur që të mbyllë Partizanin U-21 dhe të riktheje ekipin B, që para pak vitesh korri sukses dhe u ngjit deri në Kategorinë e Parë.
Tashmë kjo aventurë nis nga zero dhe ekipi i kuq do të startojë në Kategorinë e Tretë, për të provuar të përsërisë suksesin e pak viteve më parë.
Trajner i këtij ekipi do të jetë Renaldo Kalari, i cili njëkohësisht do të vijojë edhe punën si ndihmës i Veselinoviçit. Gerd Haxhiu, i cili ishte trajner i ekipit U-21 pritet të drejtojë skuadrën U-18, që do të hapet rishtazi këtë sezon.
Trajner i U-17 pritet të jetë Aldo Duro. Fatjon Muhameti do të kalojë tek U-19, ndërsa Algert Hurdha do të drejtojë ekipin U-16. Në vijim pritet të konfirmohen edhe emërimet në të gjithë akademinë e kuqe.
