Cristiano Ronaldo postoi në rrjetet sociale një mesazh ogurzi për rivalët e Arabisë Saudite të Al-Nassr, pasi shënoi në fitoren ndaj Al-Feiha.
Al-Nassr regjistroi fitoren e parë në sezonin 2024-25 në Saudi Pro Leaguee, teksa mposhti Al-Feiha 4-1 të martën mbrëma.
Talisca realizoi një dygolësh ndërsa Ronaldo dhe Marcelo Brozovic realizuan dy golat e tjerë.
Ronaldo dyfishoi avantazhin e skuadrës së tij vetëm pak minuta para fundit të pjesës së parë, teksa gjeti rrjetën me një goditje dënimi magjike që befasoi murin e Al-Feiha dhe portierin Abdulraouf Al-Duqayl.
39-vjeçari ka realizuar katër gola në sezonin aktual në po aq ndeshje të luajtura në të gjitha garat.
Pasi ndihmoi skuadrën e tij të rikthehej te fitorja, legjenda portugeze u dërgoi një mesazh rivalëve të Al-Nassr ndërsa shkroi në Instagram: “Ky është vetëm fillimi! Forca @alnassr!”.
Skuadra e Luis Castros do të rikthehet në fushë në Saudi Pro League pas pushimit ndërkombëtar, ndërsa do të përballet me Al-Ahli më 13 shtator.
