Angelo Di Livio, i intervistuar nga “Radio Bianconera”, u ndal te bardhezinjtë: “A është Juventusi i detyruar të luftojë për titullin me merkaton e bërë kësaj vere? Po, absolutisht po. Nuk ka vit zero, më vjen keq.
Giuntoli ka ndërtuar një ekip për të fituar, sidomos me ardhjen e Koopminers. Juventusi është rindërtuar shumë mirë nga stoli në të gjitha repartet. Në dy javët e para të kampionatit të ri, bardhezinjtë u shfaqën shumë inteligjentë, pranuan vetëm një goditje në portë.
Duke pasur parasysh atë që pamë në Verona, por edhe në Torino ndaj Como-s, mendoj se skuadra bardhezi është e rëndësishme. Nuk mund të rrish dhe të shikosh, Juventusi duhet të provojë. Pastaj, nëse një skuadër tjetër e fiton titullin, nuk bëhet hataja. Sidoqoftë, Juventusi duhet t’ua bëjë jetën të gjithë rivalëve të vështirë.
Thiago Motta i ka përcjellë tashmë idetë e tij te Juventusi i tij. Unë pashë një skuadër shumë të rregullt në fushë, në ndeshjen e dytë të kampionatit. Konstatova qetësinë e duhur, nuk pashë ankth apo shqetësim në ndërtimin e aksioneve. Motta po aktivizon shumë të rinj, me mjaft guxim. Ka gjithmonë një distancë të madhe mes të thënit dhe të bërit.
Duke vepruar kështu, Motta ndërmori edhe një rrezik, sepse e di që te Juventusi duhet të bëjë më të mirën e mundshme. Ai po iu jep hapësira të rinjve, vërtet e komplimentoj shumë për këtë. Pashë disa lojtarë të rinj me personalitet të madh. Për mua ato përfaqësojnë vlerë të shtuar të Juventusit në afat të gjatë”.
