Pas fitores 2-0 në “Reale Arena”, Reali i Madridit ka aktivizuar modalitetin “Champions” në prag të kompeticionit të preferuar dhe favorit.
Me vështrimin nga debutimi europian kundër Shtutgartit sot në mbrëmje në “Santiago Bernabeu”, klubi po përgatit mbrëmjen speciale të një turneu, ku ka shkruar një pjesë të rëndësishme të historisë.
TURNE SPECIAL- Reali i Madridit dhe Champions-i kanë një marrëdhënie speciale. Asnjë skuadër nuk ka fituar më shumë trofe në këtë kompeticion sesa “Galaktikët” dhe numërojnë 15 tituj në palmaresin e tyre. Pikërisht për këto mbrëmje jetojnë në “Bernabeu”.
Pa asnjë dyshim, ekipi nuk vjen në këtë ndeshje në momentin më të mirë. Ka qenë një nisje sezoni jo shumë pozitive dhe ndoshta atipike, e shënjuar nga dëmtimet e shumta. Ançeloti është duke mbledhur “copëzat” për të gjetur formulën që ekipi të funksionojë në fushën e lojës.
Pavarësisht problemeve të shumta, Reali gjithmonë transformohet në Ligën e Kampionëve, një turne që e ka dominuar si asnjë tjetër. Mbape, që me shumë mundësi bëri ndeshjen më pozitive ndaj Sociedadit që nga dita e parë që ka shkelur në “Bernabeu” është më i karikuar se kurrë.
