Mançester Siti mund të jetë pa Kevin De Bryjnen për ndeshjen e rëndësishme kundër Arsenalit të dielën, e cila do të ofronte një pasqyrë të rëndësishme se si mund të duket e ardhmja e afërt e klubit.
Mesfushori 33-vjeçar qëndroi larg fushe për shkak të një dëmtimi muskulor në kofshë deri në fillim të vitit 2024 sezonin e kaluar, por është rikthyer në formë këtë sezon, duke nisur të gjitha ndeshjet, përveç njërës. Kjo përfshinte ndeshjen e Ligës së Kampioneve kundër gjigantëve të Serisë A, Interit të mërkurën, megjithëse lojtari u largua pas pushimit pasi ndjeu një shqetësim muskulor në pjesën e parë.
De Bryjne dukej se e kapi me dorë ijën e tij kur kamerat e fiksuan atë duke shtrënguar fytyrën, ndërsa ishte ende në fushë. Fantazisti belg nuk doli sërish nga tuneli pas pushimit dhe u zëvendësua nga veterani Ilkai Gyndoan. “Nuk e di, nuk kam folur ende me mjekët”, tha Pep Guardiola gjatë konferencës së tij për shtyp kur u pyet për dëmtimin e De Bryjnes.
“Do të kem më shumë informacion kur të kem. Ne do ta vlerësojmë atë nesër (të enjten)”. Duke pasur parasysh dëmtimin dhe largimin e tij të hershëm nga loja, është e qartë se De Bryjne tani është një dyshim i madh për përballjen kundër rivalëve për titull, Arsenalit. Siti e ka përballuar mirë pa mesfushorin e tyre kryesor në të kaluarën.
Por lojtari vazhdon të ketë interes nga Arabia Saudite dhe kontrata e tij që skadon në fund të sezonit, mund të ndikojë shumë për të ardhmen e tij në “Etihad”. Marrëveshja e tij aktuale skadon verën e ardhshme dhe në të kaluarën ai e ka pranuar mundësinë e ndjekjes së një sfide tjetër, siç është Lindja e Mesme. “Në moshën time duhet të jesh i hapur për gjithçka”, tha De Bryjne për gazetën belge “Het Laatste Nieuës” gjatë merkatos së verës. “Ju po flisni për shuma të jashtëzakonshme parash në atë që mund të jetë fundi i karrierës sime. Ndonjëherë ju duhet të mendoni për këtë”.
