Real Madridi është favorit për të marrë Florian Wirtz verën e ardhshme, sipas Christian Falk.
Mesfushori gjerman kërkohet nga shumë klube europiane pas një sezoni shpërthyes 2023-24 me Bayer Leverkusen.
Wirtz regjistroi 18 gola dhe 20 asiste në 49 ndeshje në të gjitha kompeticionet, duke ndihmuar ekipin e tij të fitojë kupën dhe kampionatin.
Los Blancos po planifikojnë një të ardhme pa Luka Modric, i cili është në fazën e fundit të karrierës së tij dhe mesa duket shikojnë 21-vjeçarin si opsion.
Në rubrikën e tij për The Daily Briefing, Falk deklaroi se lojtari është gati për një aventurë të re në vitin 2025.
“Florian Wirtz e bëri shumë të qartë se ai dëshiron të bëjë hapin tjetër në vitin 2025. Ai ka një kontratë tani deri në vitin 2027, kështu që Leverkusen kërkon një shumë të madhe për shërbimet e tij – 150 milionë euro. Kjo është shumë dhe padyshim që jo çdo klub mund ta përballojë”, ka shkruar Falk.
“Klubi që udhëheq garën për nënshkrimin e tij nuk është anglez. Është Real Madridi. Kjo mund të jetë pjesë e një pakete që përfshin trajnerin e Bayer Leverkusen, Xabi Alonso, nëse spanjolli do të bëhet pasardhësi i Carlo Ancelottit verën e ardhshme.
Falk shtoi se klube të tjera, duke përfshirë Bayern Munich, Manchester City dhe Liverpool, janë gjithashtu në garë për të nënshkruar me gjermanin.
“Ka ende pak shanse për Bayern Munich të cilët kanë qenë gjithmonë në kontakt me lojtarin dhe babanë e tij, Hans-Joachim, i cili është gjithashtu menaxheri i tij. Është një ëndërr e madhe që Wirtz dhe Jamal Musiala të luajnë së bashku te Bayern”, ka shkruar Falk.
“Unë nuk mendoj se Real Madridi do të ishte në gjendje t’i blejë të dy lojtarët, ndërsa Bayern mund të nënshkruajë vetëm një. Por, sigurisht, ai përshtatet edhe me klube të tjera si Manchester City. Liverpool është gjithashtu i interesuar dhe Manchester United të mos jetë në garë për momentin”, përfundoi ai.
Wirtz e ka nisur shumë mirë sezonin e ri me kampionët e Bundesliga-s, duke shënuar pesë gola dhe duke dhënë një asist në gjashtë ndeshjet e luajtura deri tani.
