U rrit me ëndrrën që një ditë të luajë për Barcelonën, por sot, Edon Zhegrova, ylli i Lille dhe i Kosovës, përballet me rivalin më të madh të katalanasve, Real Madridin.
Kjo ndeshje e veçantë shënon sfidën më të madhe të karrierës së tij deri tani, ku ai dhe skuadra franceze do të kërkojnë një paraqitje të fortë ndaj kampionëve evropianë, shkruan Olle. Vetëm një vit më parë, Zhegrova deklaronte publikisht se ëndrra e tij ishte të vishte fanellën e Barcelonës, duke theksuar admirimin për lojën e tyre dhe për stilin që kanë promovuar ndër vite.
Sot, ai përballet me një provë të madhe ndaj rivalëve historikë, Real Madridit, duke dëshmuar se është gati për sfida të mëdha dhe për të treguar vlerat e tij në arenën ndërkombëtare.
Nëse Zhegrova arrin të tregojë potencialin e tij në këtë ndeshje të nivelit më të lartë, ky mund të jetë një hap i rëndësishëm për të në rrugën drejt realizimit të ëndrrës së tij.
Përballja me Real Madridin do të jetë një moment kyç në karrierën e tij, dhe e gjithë Kosova do të ndjekë me krenari këtë ndeshje të madhe.
