Máximo Perrone, lojtar i huazuar nga Manchester City, tani te Como, thotë se Cesc Fabregas ka “të njëjtin ADN” si Pep Guardiola.
Skuadra e sapo promovuar në Serie A, Como, do të përballet me Napolin e Antonio Contes në Stadio Maradona këtë mbrëmje.
Perrone, një mesfushor argjentinas 21-vjeçar në huazim nga Manchester City, pritet të jetë titullar për skuadrën mysafire në mesfushë.
“Më pëlqejnë mesfushorët me cilësi që krijojnë aksione. Ky është stili i lojës me të cilin identifikohem. Një model për mua? Rodri,” tha ai për “Gazzetta.”
“Ne po rritemi, ndeshje pas ndeshjeje, duke u përpjekur të ndjekim udhëzimet e Fabregas sa më mirë që mundemi. Duam të dominojmë lojën; e dimë që Napoli është një ekip i fortë, por duam të ruajmë identitetin tonë.”
Perrone iu bashkua Manchester City-t nga Velez në janar 2023 dhe sezonin e kaluar ishte në huazim te Las Palmas. 21-vjeçari ka dy paraqitje me ekipin e parë të Manchester City.
“Ishte një eksperiencë e vështirë, por formuese. Tani jam në Serie A dhe po e shijoj këtë dhe po jap maksimumin,” tha ai.
“Më pëlqen Serie A dhe mezi pres të luaj në ndeshjet e ardhshme për ta shijuar këtë sezon te Como. E dija se sa e vështirë ishte. Serie A është shumë agresive në aspektin mbrojtës.”
Como ka fituar dy ndeshjet e fundit në Serie A kundër Atalanta-s dhe Hellas Verona-s dhe duket se po përmirësohet nën drejtimin e trajnerit Fabregas.
“Është e rrallë të gjesh këtë stil loje në Itali. Shumë pak ekipe luajnë në këtë mënyrë,” tha mesfushori.
“Fabregas ka të njëjtin ADN si Guardiola. Ai dëshiron të luajë me topin, të bëjë presing të lartë dhe të sjellë shumë lojtarë në mesfushë. Mendoj se këto aspekte janë forca jonë.”
Perrone ka shënuar dy gola në nëntë paraqitje me ekipin U20 të Argjentinës, por Walter Samuel e ka vëzhguar për ekipin e parë gjatë fundjavës së kaluar në një ndeshje të Serie A kundër Veronës.
“E mësova pas ndeshjes. Ata udhëtojnë në të gjithë botën, prandaj duhet të tregosh versionin më të mirë të vetes në çdo ndeshje për të realizuar ëndrrën për të luajtur për Albiceleste,” tha mesfushori.
Në fund, Perrone u pyet se kush është lojtari më i mirë që ka parë në Serie A deri tani këtë sezon, dhe ai zgjodhi befas një shok skuadre dhe bashkëkombas: “Nico Paz. A është kjo përgjigje e pranueshme?”
Perrone ka bërë pesë paraqitje në Serie A këtë sezon, katër prej tyre si titullar, dhe ka akumuluar 392 minuta në fushë.
