Te Real Madrid ka nisur një epokë e re me ardhjen e sulmuesit francez Kylian Mbappe, që pritet të jetë një nga yjet më të mëdhenj në historinë e “los blancos”. I bindur për këtë është shoku i tij i skuadrës Federico Valverde, që ka folur për ish-sulmuesin e PSG në një intervistë për “France Football”.
“Ai është një futbollist mbresëlënës. Ne e dinim prej kohësh se kush ishte Kylian, një lojtar i nivelit të jashtëzakonshëm, një nga më të mirët në botë. Jam i lumtur që ai është në Real Madrid”, tha Valverde.
Më tej, uruguajani shton: “Është gjithnjë një kënaqësi e madhe të ndash fushën bashkë me të, si kundërshtar apo shok skuadre. Dikur kam vuajtur shumë ndaj tij kur luajta kundër PSG-së dhe kundër Francës”.
“Mbappe është një lojtar që bie në sy si gjatë ndeshjeve ashtu dhe në stërvitje. Ai është një lojtar i madh. Kjo është arsyeja pse ne jemi të lumtur që ai është me ne. Unë mund të argëtohem, madje edhe familja ime dhe fëmijët e mi mund ta shohin atë. Dhe pastaj si person ai është i jashtëzakonshëm”, shtoi uruguajani.
“Ai tashmë është dëshmuar se është një person spektakolar, duke u thënë atyre që mendonin se ai nuk do të integrohej dot këtu se e kishin gabim”, u shpreh Valverde. Që nga ardhja e tij te Real Madrid, Mbappé ka shënuar shtatë gola në njëmbëdhjetë ndeshje, duke shënuar gol që në debutimin e tij, në finalen e Superkupës së Europës.
