Dinamo ka mposhtur KF Luzin me shifrat 6-1 në miqësoren e zhvilluar në fushën e kompleksit të tyre në Arbanë.
Golat u shënuan nga 6 futbollistë të ndryshëm të cilët sfiduan veten e tyre. Bëhet fjalë për Karambën, Bregun, Vilën, Nani, Zabërgjan dhe Qardakun.
Kjo ndeshje u zhvillua në prag të derbit me Tiranën, ku blutë e Ilir Dajës do të kërkojnë tre pikët.
Me Tiranën mungon Rustem Hoxha dhe Gudiabi për kartonë, kështu që mbetet të shihet se cili do të jetë pozicioni i kapitenit: në mesfushë apo mbrojtje.
Alternativat nuk mungojnë në të dy repartet dhe trajneri Daja duhet të zgjedhë variantin më të përshtatshëm për derbin.
