“Të mbështes Juventusin apo River Plate? Është një situatë delikate për mua. Emocionalisht, unë jam tifoz i River Plate, kështu që ndjenjat hyjnë në lojë. Në karrierë, Juventus ka qenë klubi më i rëndësishëm për mua, në nivel personal dhe profesional”.
Kjo është ajo që tha David Trezeguet, ish-lojtar i të dyja skuadrave që kanë siguruar pjesëmarrjen në Kupën e Botës për Klube, që do të zhvillohet në SHBA verën e ardhshme, midis 15 qershorit dhe 13 korrikut.
“Tuttosport” i raportoi fjalët e ish-sulmuesit francez, në periferi të një ndeshjeje të “FIFA Legends”, zhvilluar në Monterrey të Meksikës: “Në Itali më dhanë mundësinë të zbuloja se si është në të vërtetë futbolli në nivele të larta, me objektivin specifik: fitore. Te River Plate munda të jetoja një eksperiencë krejtësisht ndryshe, plot entuziazëm, emocion dhe respekt nga tifozët”.
Trezeguet bëri prognozën e vet për Botërorin e ri të Klubeve: “Do të jetë një ngjarje fantastike, një Botëror për klube, në të cilin skuadrat përfaqësojnë tifozët e tyre në mënyrë ndryshe nga ekipet kombëtare. Flas nga pikëpamja emocionale, sepse ekziston një lidhje më e fortë sentimentale.
Atje do të jenë skuadra shumë interesante dhe nga kontinente të ndryshme. Për më tepër, nga këndvështrimi i futbollit, do të kemi mundësi për të parë një lloj tjetër kompeticioni. Pastaj, diferencën do ta bëjnë lojtarët individualë dhe skuadrat pjesëmarrëse në këtë kompeticion”.
