Të hënën ceremonia e “Topit të artë”, kush do të triumfojë këtë edicion?
“Théâtre du Châtelet” në Paris hap dyert të hënën mbrëma për të mirëpritur më të mirët e botës së futbollit ndërsa lojtarët, trajnerët dhe drejtuesit mblidhen për të festuar ceremoninë e ndarjes së çmimeve të Topit të Artë 2024, i njohur ndryshe si “Oscarët e Futbollit”.
Ceremonia e së hënës do të jetë edicioni i 68-të i ceremonisë së ndarjes së çmimeve dhe këtë vit themeluesit e France Football janë bashkuar me UEFA-n për një ngjarje që feston më të mirët në lojë bazuar në performancat gjatë sezonit, nga 1 gushti 2023 deri më 31 korrik 2024.
Gjatë mbrëmjes do të shpërndahen dhjetë çmime të ndryshme dhe në ceremoninë e sivjetshme do të mungojnë dy emra kyç, pasi për herë të parë në një dekadë, as Lionel Messi dhe as Cristiano Ronaldo nuk janë përfshirë në listën e ngushtë prej 30 lojtarësh të nominuar për çmimin e lojtarit të sezonit. Sulmuesi i Real Madrid, Vini Jr dhe Rodri i Manchester Cityt, janë dy lojtarët favoritë, që priten të jenë në garë për këtë çmim këtë sezon.
