Gjatë ditës së sotme është njoftuar edhe zyrtarisht nga Feronikeli ’74 që do të tërhiqen nga garat e organizuara nga FFK-ja, me të gjitha grupmoshat.
Pas këtij vendimi të skuadrës drenicake, ka reaguar edhe kampioni në fuqi i Kosovës, Ballkani.
Ballkani i ka dalë në ‘mbrojtje’ skuadrës nga Drenasi, duke shkruar në një postim në “Facebook” se këto ‘gabime’ më nuk janë të fshehura.
“FC Ballkani e ka pranuar me shqetësim shumë të thellë, njoftimin nga Feronikeli’74 se ky klub ka vendosur të tërhiqet nga garat e mëtutjeshme të Superligës.
Arsyet e skuadrës nga Drenasi i ndjejmë të gjithë, pasi më nuk është i fshehur fakti se po përballemi me verditke kontestuese nga gjyqtarët e ndeshjeve, pothuajse çdo javë.”
Kështu, tre herë kampioni nga Suhareka i ka dërguar edhe një selam FFK-së, duke i bërë apel që të ndërmirren masa në referim.
“Ne si klub kampion e që i kemi dhënë shumë futbollit të Kosovës, bëjmë apel tek Federata e Futbollit të Kosovës që të ndërmerren masa progresive në referim, pasi kjo që sot po ndodh me Feronikelin, nesër mund të ndodh me ne apo klubet tjera kosovare”, thuhet më tutje në reagimin e Ballkanit.
