Besa të dielën (ora 13:00) do të zhvillojë një ndeshje të rëndësishme.
Djelmoshat që drejtohen nga trajneri Berat Imeri do të kenë punë me Struga Trim Lum në kuadër të rundit të 13-të në Ligën e Parë në Maqedoni.
Ndeshja në fjalë luhet në stadiumin e qytetit në Gostivar. Xhemail Esati e ka komentuar ndeshjen në fjalë. Për faqen e klubit ai ka thënë se do ta japin maksimumin në këtë sfidë.
“Normalisht kemi pasur një kalendar të ngjeshur, ku për dhjetë ditë kemi zhvilluar katër ndeshje.
Ndoshta ka ndikuar edhe lodhja tek lojtarët, por ne jemi profesionistë dhe nuk duam justifikime.
Pavarësisht dy humbjeve njëra pas tjetrës, ekipi ka karakter të fortë dhe besojmë se të dielën do të dalim me rezultat pozitiv. Luajmë në terren vendas dhe jemi maksimalisht të përgatitur dhe të motivuar për t’i marrë tre pikët e ardhshme”, deklaroi Xhemail Esati.
Në renditjen tabelore, Besa është e nënta me 12 pikë, kurse Struga TL e pesta më 19 pikë.
