Nëse ishte një natë e paharrueshme për Milanin e Paulo Fonseca-s, fitorja 3-1 në Champions League në stadiumin Bernabeu ndaj mikpritësit Real Madrid, për skuadrën e trajnerit Carlo Ancelotti eshte një tjetër humbje për t’u tretur dhe e dhimbshme. Pas humbjes poshtëruese 0-4 të pësuar në El Clasico kundër rivalëve të hidhur Barcelona më 26 tetor, Los Blancos u larguan nga Bernabeu ende me kocka të thyera.
“Gjithmonë e gjejmë veten të pabalancuar, kemi bërë të njëjtat gabime që kemi bërë në El Clasico”, deklaroi Ancelotti në fund të ndeshjes kundër Milanit. “Duhet të shqetësohemi sepse skuadra ka shumë potencial, por nuk po jep maksimumin. Kur nuk je solid në mbrojtje, lojërat mund të komplikohen, ndonjëherë rikuperon ndonjëherë jo”.
Për të konfirmuar fjalët e Ancelottit është një fakt domethënës: Real Madrid ka 7 gola të pësuar në 2 ndeshjet e fundit, një fakt vërtet i pazakontë për skuadrën më të suksesshme në botë. Kombëtarja e San Marinos mori parasysh dhe me një postim të bukur të publikuar në llogarinë e tyre zyrtare, i “ftoi” merengues në një sfidë të cilësuar si të nivelit të barabartë, pasi mesatarja e golave të pësuar nga skuadra e Roberto Cevolit është gjithashtu 7 gola për ndeshje:
“Përshëndetje Real Madrid, ne vumë re se pësuat 7 gola në Bernabeu në dy ndeshjet e fundit, një shifër e ngjashme me atë të San Marinos në çdo ndeshje, kështu që ne do të donim të luanim një ndeshje miqësore sepse besojmë se kemi nivele të ngjashme. Mendoni për këtë dhe ne do ta organizojmë atë. Një përqafim”, postimi në Twitter nga San Marino. Edhe pse në Madrid për momentin do të ketë pak dëshirë për të bërë shaka”.
