Mijëra policë po vendosen në Paris për të garantuar sigurinë në ndeshjen Francë-Izrael, një javë pas dhunës në Amsterdam, në të cilën tifozët e Maccabi Tel Aviv u sulmuan.
Shefi i policisë së Parisit, Laurent Nuñez thotë se 4,000 oficerë do të jenë në patrullë, 2,500 në Stade de France në periferitë veriore të Parisit dhe pjesa tjetër në transportin publik dhe brenda kryeqytetit.
Përveç kësaj, rreth 1,600 roje private të sigurisë do të jenë në detyrë në stadium dhe një njësi elitare e policisë anti-terroriste do të mbrojë skuadrën vizitore izraelite.
“Është një ndeshje me rrezik të lartë për shkak të një konteksti jashtëzakonisht të tensionuar gjeopolitik Ne nuk do të lejojmë asnjë përpjekje për të prishur rendin publik”, tha Nuñez.
Ndeshja e Ligës së Kombeve të UEFA-s është nën një vëzhgim intensiv pas dhunës pas ndeshjes së të enjtes së kaluar midis Ajax-it dhe Maccabi Tel Aviv në Holandë.
Stadiumi, i cili mund të mbajë 80 mijë veta, do të jetë vetëm një çerek i mbushur. Pas këshillave të qeverisë izraelite, jo më shumë se 100 tifozë izraelitë pritet të udhëtojnë në Paris, megjithëse mbështetës të tjerë të Izraelit mund të shkojnë në stadium.
Politikanët anembanë Evropës dënuan një kthim të antisemitizmit, pasi tifozët izraelitë u ndoqën nëpër rrugët e Amsterdamit.
Sipas autoriteteve të qytetit, tifozët e Maccabi ishin përfshirë në vandalizëm, duke rrëzuar një flamur palestinez, duke sulmuar një taksi dhe duke brohoritur slogane anti-arabe. Më pas ata u vunë në shënjestër nga grupe të vogla rebelësh, tha qyteti në një raport prej 12 faqesh.
Dhuna midis Izraelit dhe fqinjëve të tij në Lindjen e Mesme ka potencial të përhapet në Evropë.
Franca, Belgjika dhe Holanda kanë të gjitha popullsi të mëdha myslimane me origjinë nga Afrika e Veriut dhe ata jetojnë pranë popullsive shumë më të vogla hebreje, të cilët kryesisht identifikohen fuqishëm me Izraelin.
Për të shprehur solidaritetin me hebrenjtë evropianë pas Amsterdamit, Presidenti Emmanuel Macron ka thënë se do të marrë pjesë në ndeshjen e së enjtes, e cila fillon në orën 20:45.
Atij do t’i bashkohet kryeministri Michel Barnier si dhe presidentët e mëparshëm François Hollande dhe Nicolas Sarkozy.
