Dëmtimet e shumta në ndeshjet e fundit, duke përfshirë edhe ato të rëndat si gjuri i Karvahal apo përsëritja e këputjes së ligamentit të kryqëzuar të Eder Militaos, kanë vënë në qendër të vëmendjes një emër: Antonio Pintus.
Deri më tani nuk kishte asnjë kritikë për përgatitësin fizik.
Madje ai shihej si “magjistari” i Madridit. Por saga e dëmtimeve dhe kondicioni fizik jo optimal i një pjese të yjeve të Realit ka filluar të ngrejë pikëpyetje. Ai që është një institucion në sektorin e tij, duket se ka humbur shumë nga reputacioni i tij.
Sipas informacioneve të publikuara nga “The Athletic”, një pjesë e klubit të bardhë konsideron se metodat e tij kanë filluar të jenë të “prapambetura”! Kjo media sportive tregon për mosmarrëveshjet e para në Madrid me qasjet e Pintus, deri në kthimin e tij në një figurë që “gjeneron përçarje”.
“The Athletic” pretendon se Pintus ka pasur dhe përplasje me trajnerin Ançeloti, veçanërisht pas ndeshjes kundër Osasunës, ku Reali humbi tri lojtarë njëherazi të dëmtuar, Lukas Vaskez, Rodrigo dhe Eder Militao, me këtë të fundit që mbylli sezonin.
