Ruud Van Nistelrooy ka aplikuar për të marrë drejtimin e një klubi anglez, vetëm pak ditë pasi iu tha se nuk do të jetë më i nevojshëm tek Manchester United.
48-vjeçari i cili iu bashkua stafit të trajnerëve të Unitedit në verë së bashku me asistentin Rene Hake, u largua nga klubi pas shkarkimit të Erik Ten Hag muajin e kaluar.
Ai mori drejtimin e klubit në katër ndeshje në të gjitha garat dhe qëndroi i pamposhtur me tri fitore dhe një barazim.
Van Nistelrooy tashmë ka sinjalizuar qëllimin e tij për të vazhduar karrierën si trajner në Angli, sipas talkSPORT, të cilët kanë sugjeruar se holandezi ka aplikuar për rolin e trajnerit tek Coventry City.
Më herët gjatë këtij muaji, Mark Robins ishte shkarkuar nga Coventry pas shtatë vitesh në krye të ekipit.
Sidoqoftë, Van Nistelrooy do të përballet me konkurrencë nga Frank Lampard i cili po ashtu ka aplikuar për këtë pozitë.
Këtë e ka bërë të ditur vet pronari i klubit Doug King, i cili ditë më parë konfirmoi interesimin e Lampardit për të marrë përsipër drejtimin e ekipit të tij.
