Mircea Lucesku, selektor i Rumanisë, ende nuk po e gjen qetësinë dhe duket se as gjumin nuk e bën ashtu si duhet nga ai turp që ndodhi në Bukuresht nga tifozët rumunë, ku e provokuan rëndë kombëtaren e Kosovës.
Tani Mircea Lucesku rrugën po ia zë edhe Suedia që nuk pajtohet assesi me fitoren me rezultat zyrtar 3:0 të rumunëve ndaj Kosovës.
Ka të drejtë plotësisht Suedia.
Megjithatë, FRF do të paguajë një shumë të madhe: 128 mijë euro për shkelje të ndryshme gjatë ndeshjes dhe kombëtarja rumune ndeshjen e radhës në shtëpi do ta luajë pa shikues.
Kjo e ka goditur rëndë edhe selektorin rumun sa nuk po vajton dhe nuk i ka mend në kokë.
“Përveç Kosovës, e cila ka bërë të ditur se do të shkojë në Gjykatën e Arbitrazhit Sportiv në përpjekje për të anuluar fitoren e Rumanisë me rezultat zyrtar, një tjetër i madh i pakënaqur pas vendimit të UEFA-s është Suedia.
Të mërkurën, pasi UEFA shpalli vendimin, Kim Kallstrom, zyrtar i Federatës Suedeze të Futbollit, shprehu shqetësimin e tij për vendimin e UEFA-s.
“Pas fitores së qartë, kemi pritur njoftimin e UEFA-s për rezultatin e ndeshjes Rumani – Kosovë, tani është marrë një vendim i cili për ne është negativ.
Është e trishtueshme që gjërat që ndodhin jashtë fushës kanë një ndikim në rezultatin sportiv dhe prekin të dyja skuadrat e përfshira”, tha Kim Kallstrom, ish-reprezentuesi i njohur suedez që kaloi pjesën më të mirë të karrierës së tij në Olympique Lyon.
Çfarë deklaroi Mircea Lucescu pas deklaratave të suedezëve.
Përzgjedhësi rumun u shqetësua nga përgjigja e nordikëve dhe u kërkoi zyrtarëve të FRF që të marrin masa në këtë drejtim, po qe se shkojnë në CAS për të kërkuar drejtësi.
“Është e papranueshme kjo që po ndodh, të gjithë po godasin kombëtaren e Rumanisë! Nuk kam fjalë...
Tani e shoh që ka problem me ne edhe Suedinë. Është një mungesë respekti total, nuk dua të përdor fjalë më të forta...
Të gjithë na presin në kthesë, për të na goditur në kokë, pa asnjë lojë të ndershme.
Nuk e shihni pozicionin e Suedisë tani? Çfarë pretendimesh ka ajo?! Çfarë do të thotë?
Nuk është e drejtë, sepse është puna e djemve, është puna jonë, është punë që e kemi futur qind për qind në fushë, me talent dhe sakrificë.
Mendoj se duhet të shkojmë në CAS dhe të sfidojmë vendimin e UEFA-s!
Kjo është normale, le të mbrojmë të drejtat tona deri në fund dhe duhet ta bëjmë me forcë.
Do të doja të kishte më shumë zëra nga vendi, madje edhe zëra politikë, institucionalë, nga liderët e Rumanisë, për të na mbrojtur.
Sepse e shihni se çfarë po ndodh, filluan në nivel shtetëror të na sulmojnë ne, në nivel presidentësh, në nivel ministrash.
Dhe nuk është në rregull, sepse asgjë raciste apo ksenofobike nuk ka ndodhur në Bukuresht.
Është e pabesueshme që do të luajmë një ndeshje pa shikues.
E kuptoni, le t'i privojmë tifozët rumunë nga spektakli, të mbështesin kombëtaren, kur praktikisht nuk ndodhi asgjë, kur në fakt ne jemi viktima?! Kjo nuk është aspak e drejtë!
Një gjë e tillë nuk është e mundur!
Është e padrejtë të luash pa spektatorë, nuk mund të ndëshkohemi në këtë mënyrë, ne që u goditëm dhe u bëmë keq, nuk mund të përfundojmë duke paguar vazot e thyera nga të tjerët. I cili gjithashtu iku nga fusha dhe u fsheh në dhomat e zhveshjes...
Duhet të shkojmë në CAS, të apelojmë, sepse është një vendim që nuk ka asgjë të përbashkët me realitetin.
Do të ishte një precedent i rrezikshëm, tani e tutje kushdo mund të largohet nga fusha nëse nuk i pëlqen rezultati.
Është një vendim që i jep ujë mullirit për të tjerët, shembulli i Suedisë... Kjo që po bëjnë suedezët është e papranueshme.
Të gjithë duan të na vjedhin punën!”, ka deklaruar Mircea Lucescu, përcjell media rumune “Fanatik”.
