Trajneri i Arsenalit, Mikel Arteta ka konfirmuar se Benjamin White do të mungojë me muaj të tërë, pas operacionit në gju.
Trajneri i “Topçinjëve” ka thënë se White kishte vuajtur nga disa shqetësime, dhe se vendimi për t’u operuar ishte marrë gjatë pushimit dyjavor këtë muaj.
“Kanë qenë vuajtje të ndryshme, asnjëherë të njëjta. Kishim nevojë për një vendim. Këto javët e fundit nuk ka pasur asnjë përmirësim, fatkeqësisht”, ka thënë Arteta, me skuadrën e tij që luajnë ndaj Nottinghamit këtë të shtunë.
“Ne e dimë se Ben (White) do të mundohej t’ia dilte, por ne erdhëm në një pikë që duhej ta mbronim lojtarin dhe të shkonim për operim. Ai u pajtua me këtë dhe ai do të jetë jashtë fushave për disa muaj”, ka thënë trajneri spanjoll.
Kur u pyet se kur do të kthehet White, Arteta ka thënë: “Do të shohim se si do të jetë White pas operimit. Nuk besoj se do të jetë më shumë se gjysmë viti”.
Arsenal do të ketë në disponim Declan Ricen dhe Bukayo Sakan, me dyshen që nuk ishin të pranishëm me Anglinë gjatë ndeshjeve të këtij muaji në Ligën e Kombeve.
Mbrojtësi italian, Riccardo Calafiaori ende është në dyshim për përballjen e nesërme, teksa Takehiro Tomiyaso është e sigurtë që do të jetë jashtë fushës së blertë dhe bankës rezervë për këtë takim..
