Pas pak më shumë se një viti sot Struga Trim Lum rikthehet të luajnë në Strumicë kundër AP Brera…
“Moti po bëhet më i ftohtë, por gjërat po nxehen për Struga Trim Lum, skuadër kjo që vazhdon të ngjitet në renditje, falë një serie pozitive të rezultateve në ndeshjet e fundit.
Kampionët në fuqi sot do të përballen me AP Brera në Strumicë, duke shpresuar që edhe pas kësaj ndeshje seria e fitoreve nuk do të ndërpritet.
Struga Trim Lum ka regjistruar tre fitore të njëpasnjëshme, derisa AP Brera në dy ndeshjet e fundit ka pësuar po aq disfata.
AP Brera në 7 ndeshjet e deritanishme si vendas, ka regjistruar 3 fitore, 2 barazime dhe 2 disfata. Sileksi ishte skuadra e fundit që ju kishte marrë masën atyre në Strumicë, derisa një disfatë tjetër në shtëpi, kjo skuadër e kishte pësuar nga Shkëndija, që në xhiron e tretë.
Ndryshe, sezonin në fjalë, AP Brera e kishte nisur mjaft mirë, me një fitore 3:1 ndaj Vardarit. Një fitore tjetër e kishte arritur edhe ndaj Besës së Dobërdollit (3:2), ndërkohë fitoren më të thellë dhe të fundit në terren vendas, kjo skuadër e kishte regjistruar në ndeshjen ndaj Pellisterit.
4:0 kishte përfunduar kjo ndeshje në favor të AP Brera, që tashmë gati dy muaj nuk dinë për fitore në Strumicë.
AP Brera për momentin nuk mund të lëvdërohet me rezultate pozitive, mirëpo kjo skuadër pa dyshim se mund të lëvdërohet me golashënuesin më të mirë të kampionatit, që e ka në radhët e veta. Fjala është për serbin, Gjorgje Ivkoviç, i cili në 14 ndeshje ka realizuar 9 gola dhe për momentin udhëheq listën e golashënuesve, para treshes, Besart Ibraimi, Marko Gjorgjievski dhe Lanre Kehinde, që kanë nga 7 gola.
Ivkoviç në tre ndeshje ka realizuar nga dy gola, edhe atë kundër Vardarit, Besës së Dobërdollit dhe së fundmi Shkëndijës. Një gol tjetër i njëjti kishte realizuar sërish kundër Vardarit, ndërkohë gjithashtu kishte qenë preciz edhe në ndeshjet ndaj Pelisterit dhe FC Shkupit.
Mbrojtja ynë deri më tani i’a ka dalë mbarë përballë sulmuesit shtatëlartë, i cili te AP Brera po zhvillon sezonin e tij të dytë, duke pasur parasysh se skuadrës nga Strumica iu bashkua janarin e këtij viti”, njofton FC Struga.
