Trajneri i Liverpool, Arne Slot, ka deklaruar se për skuadrën e tij do të jetë një sfidë përsëritja e rezultateve të deritanishme, me “reds” që po shkëlqejnë si në Premier League ashtu dhe në Champions League. Të mërkurën, kryesuesit e kampionatit anglez do të luajnë ndaj Real Madrid, kampionëve në fuqi në Europë.
Slot paralajmëroi se natyra e Premier League e bën të vështirë për skuadrat të ruajnë atë lloj konsistence dhe se tifozët nuk duhet të presin automatikisht që skuadra e tij të realizojë një “tripletë”. “Premier kërkon shumë nga çdo lojtar, çdo fundjavë. Dhe, nëse më pas luani në Evropë, atëherë nuk është gjithmonë e lehtë”, tha Slot.
“Ka vetëm disa skuadra në Angli që kanë treguar se mund ta bëjnë këtë.
Edhe Liverpool e ka treguar këtë në të kaluarën për shumë sezone, ndaj kjo është arsyeja pse skuadrat në Angli kanë një përbërje kaq të madhe me lojtarë.
Ndaj Southampton, tre lojtarët që hynë patën ndikim në lojë dhe kjo është ajo që na nevojitet”, shtoi holandezi.
“Ndaj, është e vështirë të ruajmë një ritëm të tillë deri në fund. Është mirë të kesh këtë pozicion në renditje, por nuk do të rrëmbehemi dhe të kalojmë në eufori, pasi sezoni është i gjatë. Duhet kujdes që nga sfida e radhës ndaj Real Madrid”, tha Arne Slot..
