Edon Zhegrova do të zbresë sonte përsëri në fushën e blertë në garën më prestigjioze të futbollit evropian, të cilën ia ka marrë dorën goxha mirë.
Ylli kosovar do të synojë ta vazhdojë shkëlqimin në Ligën e Kampionëve, siç ka bërë që nga faza kualifikuese, për të vazhduar në fazën e ligës.
Ish-futbollisti i Baselit i shfaqi vlerat e tij magjike në dy fitoret e mëdha ndaj gjigantëve madrilenë, Realit dhe Atleticos, ndërsa sonte e pret një tjetër sfidë evropiane.
Me Lillen e tij, përfaqësuesi kosovar do të mundohet të shkëlqejë në tokën ku mund të jetë e ardhmja e tij.
25 vjeçari do të zbarkojë në Itali, ku e pret skuadra vendëse, Bologna.
Ekipi francez e synon fitoren e tretë në këtë garë për t’u ngritur në tabelë, ndërsa përballë do ta ketë ekipin që s’e ka shijuar ende fitoren në Champions.
Zhegrova, nga ana e tij, i ka realizuar katër gola në këtë garë në edicionin 2024/25, prej tyre tri në fazën kualifikuese dhe një në fazën e ligës.
Sonte po ashtu do të jetë një mundësi e artë për “Messin e Kosovës” që t’i tregojë vlerat e tij në këtë ndeshje që mund të konsiderohet si e veçantë pasi skautët dhe zyrtarët e klubeve të mëdha evropiane që e duan atë, do ta kenë rastin që ta shohin nga afër atë në stadium.
Milani, Juventusi dhe Napoli janë tri ekipet e njohura italiane që ia kanë vënë syrin futbollistit më të mirë shqiptar të momentit.
Faqja e specializuar për vlerat e futbollistëve – Transfermarkt, e vlerëson Zhegrovën me 25 milionë euro..
