Partizani është dominues në çdo statistika këtë sezon, por edhe në vitet e fundit ndaj Tiranës. Në derbit e zhvilluar mes tyre, “Demat” ka treguar gjithmonë “dhëmbët”, duke bërë që rivali i tyre i kryeqytetit të mos shijojë fare fitoren në 2 vitet e fundit.
Në përballjet mes tyre gjatë 2 viteve të fundit, Tirana nuk ia ka dalë të sigurojë asnjëherë fitoren, duke thelluar statistikat negative kundrejt të kuqve. Fitorja e fundit e bardhebluve ndaj të kuqve është më 2 tetor 2022.
Në atë derbi Tirana triumfonte pastër 2-0, ku dopieta e Redon Xhixhës ngjyroste Bardhe e Blu kryeqytetin.
Pas kësaj ndeshje janë luajtur 8 derbi, ku Partizani ka triumfuar në 5 prej tyre, teksa 3 të tjerë kanë përfunduar në barazim.
Gugash Magani do të ketë një mision shumë të vështirë ditën e dielë. Në arenën kombëtare duke nisur që nga ora 19:00 do të synojë t’u rikthejë bardhebluve “lavdinë” dhe të ndryshojë për në favorin e tyre statistikat. Një 90-të minutësh mjaft i luftuar mes dy ekipeve më me rivalitet në futbollin shqiptarë, ku spektakli nuk do të mungojë as në fushë e as në tribuna.
