Holandezi Ruud van Nistelrooy, 48 vjeç, u zyrtarizua si trajneri i ri i Leicester City, i 16-ti në Premier League. Kontrata e tij është e vlefshme deri në qershor 2027 dhe ai pason Steve Cooper të shkarkuar.
Sfida e parë e ish-holandezit është planifikuar për të martën dhe është kundër West Ham-it të Julen Lopetegui, në stadiumin King Power.
Në fjalët e tij të para si trajneri i ri i “Dhelprave”, Van Nistelrooy kujtoi bisedën e tij me një ish-bashkëlojtar të Málaga-s, i cili tani është edhe trajneri i Chelseat: "Kur u shfaq mundësia, personi i parë që thirra ishte Enzo Maresca.
Ai ishte shumë i kënaqur me kohën që kaloi në Leicester dhe, prandaj, e pyeta për strukturën, klubin, njerëzit që punojnë atje, stadiumin, tifozët, qytetin... Ishte një bisedë e mrekullueshme, fantastike. Është gjithmonë kënaqësi të flasësh me të”.
