Mesfushori i Juventusit, Douglas Luiz, po kalon një periudhë të vështirë në Torino, por sipas raportimeve në Itali, ai nuk dëshiron të largohet nga klubi në janar.
Sipas Tuttosport dhe Calciomercato.com, mesfushori brazilian është i vendosur të qëndrojë dhe të luftojë për një vend titullari nën drejtimin e Thiago Mottës.
Luiz, 26 vjeç, ishte një nga blerjet më të shtrenjta të Juventusit verën e kaluar, por nuk ka arritur të justifikojë çmimin e tij, duke luajtur vetëm 312 minuta pa gola apo asistime. Ish-ylli i Aston Villës aktualisht është i dëmtuar dhe nuk do të jetë i disponueshëm për ndeshjen e së shtunës kundër Bolonjës në Allianz Stadium.
Megjithatë, mediat italiane raportojnë se braziliani është i gatshëm të dëshmojë vlerat e tij kur të rikthehet në pjesën e dytë të sezonit. Javën e kaluar, La Gazzetta dello Sport raportoi se drejtori i Juventusit, Cristiano Giuntoli, kishte ofruar Douglas Luiz dhe Nicolò Fagioli te Manchester United dhe Manchester City.
Douglas Luiz iu bashkua Juventusit nga Aston Villa për 50 milionë euro, por transferimet e përhershme të Enzo Barrenechea dhe Samuel Iling-Junior te klubi i Premier League e reduktuan koston reale të brazilianit në rreth 28 milionë euro.
