Gjatë konferencës për shtyp para ndeshjes kundër Atalanta-s, trajneri i Milanit, Paulo Fonseca, theksoi se pret më shumë nga Rafael Leao.
Kuqezinjtë do të përballen me Atalanta-n në një ndeshje të rëndësishme të Serie A të premten. Leao shënoi një gol në fitoren 6-1 kundër Sassuolo-s në Coppa Italia të martën dhe ka kontribuar në 10 gola këtë sezon.
Megjithatë, Fonseca kërkon më shumë nga bashkëkombësi i tij.
“Besoj se Rafa ka hapësirë për përmirësim,” tha ai.
“Ai ka luajtur mirë në ndeshjet e fundit, edhe në aspektin e angazhimit mbrojtës, por nuk jam plotësisht i kënaqur. Mendoj se Rafa ka cilësinë për të bërë më shumë dhe mentaliteti i tij duhet të jetë për të bërë edhe më shumë.
Ai ka shënuar pesë gola dhe duhet të mendojë se mund të shënojë 20. Kur kemi cilësi, duhet të jemi kërkues ndaj vetes; mendoj se kjo është ajo që i duhet Rafës. Kurrë të mos kënaqet dhe të jetë ambicioz për të bërë gjithnjë e më shumë. Është në rrugën e duhur, por nuk mund të ndalet tani.”
Leao iu përgjigj kritikave nga media të mërkurën duke postuar një intervistë të vjetër të Zlatan Ibrahimovic në Instagram.
Portugezi ka tre gola dhe katër asistime në 12 paraqitje në Serie A këtë sezon.
Gjatë konferencës për shtyp, Fonseca shtoi gjithashtu se nuk është “kurrë” momenti i duhur për t’u përballur me Atalanta-n, e cila ka fituar tetë ndeshje radhazi në kampionat, duke shënuar 26 gola dhe pësuar vetëm katër.
Atalanta është vetëm një pikë pas kryesuesve të tabelës, Napoli, dhe është e pamposhtur në Ligën e Kampionëve.
