“Superylli i ri i PSG-së është skuadra, por kemi edhe shumë yje të tjerë. Ajo që është ndryshe sot? Kemi një kolektiv të fortë në fushë, por edhe institucion të fortë e të qëndrueshëm jashtë saj”. Këto janë fjalët e Nasser Al-Khelaifi, presidentit të PSG-së, gjatë një interviste për “Marca”.
Ai shtoi: “Ne mendojmë në afat të shkurtër, të mesëm dhe të gjatë. Nuk kufizohemi vetëm te zgjidhjet impulsive apo emocionale. Po ndërtojmë një ekip të ri dhe po krijojmë një identitet. Natyrisht, duam të fitojmë çdo ndeshje dhe të konkurrojmë në çdo kompeticion, por me durim dhe këmbëngulje. Jemi për evoluim të vazhdueshëm, jo revolucion javor, siç e them shpesh”.
I pyetur për Kylian Mbappé, i cili po përjeton një periudhë të vështirë te Real Madridi dhe në kombëtare, Al-Khelaifi tha: “Siç kam thënë gjithmonë, i uroj më të mirën Kylian-it dhe të gjithë atyre që kanë luajtur për këtë klub të madh”.
Al-Khelaifi lavdëroi trajnerin spanjoll dhe përpjekjet e klubit: “Sezonin e kaluar arritëm gjysmëfinalen e tretë të Ligës së Kampionëve në pesë vite, ndërkohë që kemi fituar çdo trofe tjetër. Kemi transformuar strategjinë dhe strukturën tonë. Jemi në krye të kampionatit dhe këtë verë do të marrim pjesë në Kupën e Botës për Klube të FIFA-s”.
Mesazhi për mbështetësit: “Është e vërtetë që disa rezultate nuk erdhën këtë sezon në Ligën e Kampionëve, por kur gjërat bëhen të vështira, duhet të qëndrojmë të bashkuar dhe ta mbështesim skuadrën.
Kjo është ajo që bëjnë tifozët tanë, edhe pse disa media nuk e bëjnë. Kemi një trajner fantastik, Luis Enrique, dhe një këshilltar sportiv të shkëlqyer, Luis Campos. Si klub, mbështesim plotësisht lojtarët dhe stafin teknik. Bazat tona janë të forta, ambiciet tona nuk kanë ndryshuar aspak”.
