Prej edicionit 2025/2026, Superkupa e Gjermanisë do të quhet me emrin e futbollistit më të madh gjerman të të gjitha kohërave, Franz Beckenbauer.
Këtë e bëri të ditur të premten Federata e Futbollit e Gjermanisë.
Për Superkupë luajnë kampioni i Bundesligës dhe fituesi i Kupës gjermane. Dhe prej edicionit të ardhshëm fituesi i kësaj ndeshjeje do ta fitojë “Superkupën Franz Beckennbauer”.
Federata gjermane dhe liga gjermane e futbollit kanë vendosur ta nderojnë në këtë mënyrë ikonën e futbollit.
Beckenbauer vdiq më 7 janar të këtij viti, në moshën 78-vjeçare. Kontributi i tij për futbollin vlerësohet shumë i madh.
“Franzi do të donte që ndeshja mes kampionit të Gjermanisë dhe fituesit të Kupës së Gjermanisë të quhej me emrin e tij. Sidomos pasi ai ka fituar të dy garat për shumë herë. Dua të falënderoj personalisht Bernd Neuendorfin dhe Hans-Joachim Ëatzken për bashkëpunimin e mirë dhe që shprehën mirënjohjen për Franzin”, ka thënë e veja e Beckenbauerit, Heidi.
Presidenti i federatës gjermane, Bernd Neuendorf, ka thënë se është e rëndësishme për të dhe federatën që ta nderojnë veprën e Franz Beckenbauerit.
“Kontributi i tij për futbollin është i pakrahasueshëm dhe i paharrueshëm. Me riemërimin e Superkupës po krijojmë një lidhje të pafundme të futbollit me Franz Beckenbauerin. Këtu përfshihet jo vetëm niveli profesional, por edhe amator që merr pjesë në garën për Kupë. Pos familjes së Beckenbauerit e falënderojmë edhe ligën, që e bëri riemërimin të mundshëm”, ka thënë Neuendorf.
Beckenbauer ka fituar Kupën e Botës si lojtar dhe si trajner. Lista e sukseseve të tij si futbollist e si trajner është shumë e gjatë.
“Franz Beckenbauer ishte fëmijë i Bundesligës. Vështirë dikush tjetër i ka dhënë formë Bundesligës si ai. Jam shumë i lumtur që Superkupa tani e mban emrin e Beckenbauerit, një iniciativë e ligës gjermane dhe federatës. Dua të falënderoj familjen e Beckenbauerit për diskutime pozitive në muajt e kaluar”, ka thënë Hans-Joachim Ëatzke nga liga gjermane.
Vitin e ardhshëm ndeshja për Superkupë të Gjermanisë do të zhvillohet më 16 gusht.
